صحفي مصري






مقالات حرة

شعر وأدب

بحوث

مدونةعمار مطاوع
صحفي مصري



كيف تصبح محررًا صحفيًا؟


بسم الله، خلينا نتجاوز المقدمات الطويلة وندخل مباشرة في الموضوع.. المفروض بعد نهاية الموضوع ده تكون جاهز للبدء في العمل كمحرر أو مراسل صحفي، وهنناقش الموضوع 4 دروس كبيرة:


• الدرس الأول: المهن المرتبطة بالصحافة (محرر- مراسل- مصور- مصمم..إلخ).
• الدرس التاني: مفاهيم رئيسية للتحرير الصحفي.
• الدرس التالت: المهارات الأساسية للمحرر الصحفي.
• الدرس الرابع: إزاي تبدأ مشوارك في الصحافة؟

نصايح عشان تفهم الكلام ده بأفضل صورة:
• اقرأ كل الكلام اللي هنا بهدوء واستيعاب، ما تستعجلش.
• قسم الدروس كل مرة في قعدة، مش هتعرف تستوعب كل حاجة في قعدة واحدة.
• اتدرب بعد كل عنصر، وحاول تشوف أمثلة كتيرة، ما تطنش الأسئلة.
• حاول تستوعب إن مهارات الصحافة مش بس مفيدة في الصحافة، لأ، في حياتك العامة، كفاية إنك هتتعود ما تقولش معلومة من غير مصدر.

يلا، نبدأ بسم الله..

الدرس الأول: المهن المرتبطة بالصحافة:

وهنتكلم عن الدرس ده في عنصرين:
أولا: الرحلة التقليدية للخبر الصحفي.
ثانيا: الرحلة الحديثة للخبر الصحفي - المحرر الشامل.

• أولا: الرحلة التقليدية للخبر الصحفي:


الخبر اللي بتشوفه قدامك على الفيسبوك أو تويتر بيمر بعدد من المراحل عشان يوصلك، كل مرحلة من المراحل دي مهنة مستقلة، ليها مهارات مختلفة.. وبالتعاون بين المهارات دي، بيخرج الخبر في الصورة اللي بيظهر بيها قدامك.


التسلسل التقليدي القديم للخبر الصحفي إنه عشان يتعمل، بيبدأ من أول المراسل اللي في الشارع اللي بيشوف الخبر، أو بيرصد تغريدة مهمة على تويتر لواحد من الشخصيات العامة، أو بيروح يحضر مؤتمر لحزب أو مسؤول معين، وده اسمه (مراسل صحفي)، ودايما بيكون معاه مصور شايل الكاميرا وبيلف بيها واسمه (مصور صحفي).

المراسل ده بيكتب الخبر بسرعة في جملة أو اتنين ويبعتهم للمحرر المتخصص اللي بيبقي قاعد على مكتب بيصيغ الخبر من تاني لكن بشكل منظم ومرتب، ودا اللي بنسميه (محرر صحفي).. بعد كده الخبر بيروح للمصحح اللغوي اللي بيراجع أخطاء الكتابة اللغوية والصياغية، وده بنسميه (مدقق لغوي).

بعدها الخبر بيروح للناشر أو المخرج اللي بيرفع الخبر ع الموقع وبيظبط الصور والفيديوهات والتصماميم أو بيعملها من البداية وبيجهزها للنشر، وده بنسميه (أبلودر صحفي).. وأخيرا الخبر بيروح  للسوشيال ميديا اللي بينشر الخبر على مواقع التواصل والنشر وبيتابع التعليقات ويرد عليها وخلافه، وده بنسميه (محرر سوشيال ميديا).

وفيه مهن تانية مساعدة، زي محرر الديسك أو مراجع الصياغة أو المبرمج بتاع الموقع، والآي تي اللي بيظبط الشبكات والأجهزة، ومدير التحرير (أو مسؤول الشيفت) اللي بيشرف على الرحلة دي كلها، ومصمم الفيديوجراف والبرومات وغيرها من الوظائف التكميلية والأساسية.

• ثانيا: الرحلة الحديثة  للخبر الصحفي - المحرر الشامل:


طبعا اللي فوق ده هو التسلسل القديم التقليدي، اللي كان بيستخدم أكتر مع الصحف الورقية البطئية، لكن مع دخول عصر الهواتف الذكية، ما بقاش فيه وقت لكل المراحل دي، وأصبحت المواقع بتبحث عن الصحفي الشامل، اللي بيعمل كل حاجة، اللي يقدر يعمل كل الدورة دي بنفسه من غير مساعدة من حد، فيرصد الخبر في الشارع ويصوره ويكتبه مظبوط ويرفعه على الموقع ويشيره على مواقع التواصل.

بعد شوية هنتكلم عن الفرق بين الصحافة الورقية والصحافة الإلكترونية، وهتعرف إن الفرق الأساسي بينهم هو السرعة، فالصحف بقت عايزة اللي يخلص كل حاجة بسرعة، يعني مثلا، المحرر يكتب الخبر بلغة صحيحة، فمايحتاجش إن المصحح اللغوي يراجع وراه، وبالتالي يبقي اختصارنا مرحلة كاملة من رحلة الخبر.

وعشان تكون صحفي شامل، لازم تكسب مهارات كل مهنة من المهن دي، فتتعلم مهارات التصوير، ومهارات التسويق، ومهارات التصميم، فضلا عن المهارة الأساسية اللي هيا مهارة التحرير.. باختصار، إذا كان الصحفي زمان عبارة عن شوية مصادر، فالصحفي دلوقتي عبارة عن شوية مهارات.

إحنا هنتكلم هنا عن مهارات التحرير الصحفي، ودي هتحتاجها سواء كنت مراسل أو محرر أو سوشيال ميديا أو حتى مصور.. وامتلاك المهارات الصحفية دي هيا بوابتك للبداية في عالم الصحافة.

وهنقسم كلامنا عن التحرير الصحفي في العنصرين القادمين: أولا: مفاهيم التحرير الصحفي، وثانيا: مهارات المحرر الصحفي.


الدرس التاني: مفاهيم رئيسية للتحرير الصحفي: 


ودي هنتكلم عنها في 4 نقاط:
أولا: أبسط شكل للخبر الصحفي.
ثانيا: أشكال تانية معقدة من الكتابة الصحفية زي التقرير والحوار والتحقيق وغيرهم.
ثالثا: الفرق بين الصحفي والكاتب، الخبر والمقال، المعلومة والرأي..إلخ.
رابعا: الفرق بين الصحافة الورقية والإلكترونية وعلاقتهم بالتقدم التكنولوجي.

أولا: أبسط أشكال الخبر الصحفي:


الخبر الصحفي في أبسط أشكاله بيكون عبارة عن (عنوان+3 فقرات)، وأحيانا بيخلوه (عنوان وفقرتين)، ولو خبر عاجل بيكون عنوان بس، أو عنوان وفقرة واحدة.

إحنا هناخد الرأي اللي بيقول إن الخبر بيكون عنوان + 3 فقرات.. وهنبدأ نحلله واحدة واحدة:

- العنوان:
• بيكون مختصر جدا، كل حاجة فيه مختصرة، الأسماء والتفاصيل والمعلومات.. بدل ما تكتب رئيس وفد التكتل السوري المعارض بتكتب (رئيس «المعارضة السورية»)، وبدل ما تكتب: محمد أبو تريكة، بتكتب: «تريكة».. وهكذا بتختصر كل الكلمات في العنوان لحد ما تخليه في أقصر شكل ممكن.. وطبعا اللي تختصره لازم تحطه بين قوسين.

• أبرز غلطة في العناوين هيا تكرار الكلمات، ماينفعش تكتب: شركة الكهرباء تحذر المواطنين من ارتفاع أسعار الكهرباء.. قول: شركة الكهرباء تحذر المواطنين من ارتفاع الفواتير، مثلا.

- الفقرة الأولى: 
• بيكون فيها نفس المعلومات اللي في العنوان، بس بتوسع أكبر، وبتحط الأسماء كاملة، يعني بدل ما تكتب «تريكة»، تقول: نجم المنتخب المصري والنادي الأهلي السابق محمد أبو تريكة.. وبدل ما تكتب: رئيس المعارضة السورية، تكتب: رئيس وفد التكتل السوري المعارض في مفاوضات الأستانة، باسل الصغير.. وهكذا.

• حاول تكون الفقرة الأولى دايما فيها نفس المعلومات اللي في العنوان، عشان القارئ ما يزهقش من البحث عن الفقرة اللي فيها المعلومة اللي في العنوان.

- الفقرة الثانية:
• دي بقى أخطر فقرة، ومنها بنعرف درجة احترافية الصحفي اللي بنتعامل معاه.. السبب إن الفقرة دي لازم يتذكر فيها المصدر اللي جبت منه الخبر.. مثلا تقول: (وأكد أبو تريكة، في حوار أجراه أمس مع صحيفة الشروق المصرية، أن).. أو تقول: (وأشار الصغير، خلال كلمته التي ألقاها أمام حشد من وزراء خارجية الدول المانحة، إلى أن).. وهكذا.

• طبعا خد بالك إن الأسماء والشخصيات بيتكتب اسمها بالكامل في الفقرة الأولى بس، لكن بعد كده بتتذكر بالاختصار بتاعها، يعني ما ينفعش تقول في الفقرة التانية: اللاعب محمد أبو تريكة وإنت قايل اسمه بالكامل في الفقرة الأولى.. قول أبو تريكة وخلاص.

- الفقرة الثالثة:
• دي فقرة مش مهمة قوي، لكنها بتبرز قد إيه إنت فاهم الموضوع اللي بتكتب عنه.. هدف الفقرة دي إنك تعمل خلفية للموضوع، يعني لو ناقل عن أبو تريكة قوله إنه هيرجع مصر قريب، لازم تقول في الفقرة الأخيرة دي إن أبو تريكة مطلوب القبض عليه في مصر بسبب وضعه على قوائم الإرهاب.. وهكذا.

• الفقرة دي عادة بتبدأ بكلمات من نوعية: يشار إلى أن، جدير بالذكر، ومن الجدير ذكره، ومن المنتظر، ومن المتوقع... إلخ.. وبيظهر فيها ثقافة المحرر ومدى معرفته بآخر الأخبار والتطورات اللي بتحصل في الموضوع اللي بيكتب عنه.

- مثال
• خلينا ناخد مثال على الكلام ده.
المعلومة اللي عندك إن اللاعب محمد صلاح كتب على تويتر إنه مش هيقدر يلعب الماتش الجاي مع المنتخب المصري.. تعمل الخبر إزاي؟
«صلاح»: لن أتمكن من المشاركة في مباراة غانا
قال مهاجم المنتخب المصري الدولي، محمد صلاح، إنه لن يتمكن من المشاركة في مباراة منتخب بلاده في نهائيات كأس العالم أمام منتخب غانا، المزمع عقدها في ديسمبر المقبل.
وكتب صلاح، في تغريدة عبر موقع التواصل الاجتماعي تويتر: "أعتذر للجماهير، لن أتمكن من المشاركة في مباراة غانا، قدمي تؤلمني".
يشار إلى أن صلاح تعرض للإصابة خلال مباراة فريقه روما أمام ميلان بالدوري الإيطالي مساء أمس، مما اضطره لمغادرة الملعب في الدقائق الأولى.

ناخد مثال تاني:
المعلومة اللي عندك إن اللي صرح بغياب محمد صلاح عن المبارة هو مصدر بالفريق الطبي للمنتخب، وقال الكلام ده لصحيفة الوطن المصرية.. تعمل الخبر إزاي؟
مصدر بالمنتخب: «صلاح» لن يشارك في مباراة غانا
كشف مصدر بالفريق الطبي للمنتخب المصري عن غياب مهاجم الفريق، اللاعب الدولي، محمد صلاح عن مباراة غانا في ديسمبر المقبل ضمن التصفيات المؤهلة لكأس العالم.
وأكد المصدر، في تصريح نقلته صحيفة "الوطن" المصرية، أن صلاح تعرض للإصابة خلال مباراة فريقه روما أمام خصمه ميلان بالدوري الإيطالي مساء أمس، وهو ما أجبره على مغادرة الملعب فور الدقائق الأولى.
يذكر أن منتخب مصر يخوض مباراة فاصلة مع نظيره الغاني ضمن التصفيات المؤهلة لبطولة كأس العالم المزمع عقدها في قطر مطلع العام المقبل.

جرب إنت بقى تعمل خبر من المعلومة دي: 
المعلومة إن وزير الاقتصاد المصري توفي أمس في القاهرة إثر حادث مروري.. ومصدرها وكالة رويترز اللي نقلت الكلام ده عن طبيب في مستشفى المعادي اللي استقبل ضحايا الحادث.

جميل، ناخد مثال تاني لكن دولي شوية.. اعمل خبر من المعلومة دي:
المعلومة إن الرئيس التركي أرودغان قرر منح جميع اللاجئين السوريين في بلاده إقامة دائمة.. والمصدر: وكالة الأناضول التركية اللي نقلت الكلام ده عن مصدر رئاسي تركي.

خلي بالك إن لو المصدر بتاع الخبر حصري للموقع بتاعك، يبقي تكتب (في تصريحات خاصة)، أو (بحسب مراسل الصحيفة).. أو أي حاجة تكون على السياق ده.

----

ثانيا: أشكال تانية معقدة من الكتابة الصحفية زي التقرير والحوار والتحقيق وغيرهم.


1- الخبر العاجل: 
عادة لا يتجاوز فقرة واحدة.. لكن الأسماء والصفات تأتي فيه كاملة، فلا نختصر الألقاب مثل العنوان.. مثال:
عاجل: الرئيس الأمريكي دونالد ترامب يوافق على مسودة مشروع «حماية إسرائيل»
عاجل: مقتل 5 مدنيين عراقيين في تفجير استهدف سوقا شعبيا في بغداد

2. التقرير:
هو الشكل الأكثر انتشارا بعد الخبر العادي، ويكون عبارة عن محاولة رصد «كل شيء» عن موضوع معين بسبب حصول حدث جديد فيه، مثلا: هناك خبر جديد عن القبض على اللاعب محمد أبو تريكة في المطار.. هنا يكون التقرير عبارة عن محاولة رصد كل القصة المتعلقة باللاعب منذ بداية التوتر مع النظام حتى لحظة القبض عليه.. ويأخذ التقرير شكل القصة القصيرة التي تبدأ عادة بآخر التطورات، مثلا: 
لم يكن يدور بخلد أحد أن تسارع قوات الأمن المصرية بتوقيف مهاجم منتخبها المخضرم، محمد أبو تريكة، فور عودته إلى البلاد.
وكانت مصادر أمنية قد أعلنت القبض على تريكة صباح اليوم بالصالة الثانية بمطار القاهرة الدولي قبل أن يتم اقتياده إلى جهة لم يُعلن عنها بعد.
تريكة، بدوره، لم يعترض قوات الأمن لحظة إيقافه، بينما قال محاميه، ياسر الطيب، في مداخلة إعلامية قبل قليل إن اللاعب سيصعد قضائيا ضد توقيفه، الذي وصفه المحامي بالظالم..... وهكذا

3-تقرير ردود الأفعال:
وهو تقرير عادي مثل السابق، لكن الفرق هو لا يحكي قصة، وإنما يرصد ردود الأفعال المؤيدة أو الغاضبة تجاه الواقعة.. وقد يرصد الصحفي في تقريره ردود أفعال المتخصصين كالرياضيين أو السياسيين، وقد يرصد ردود افعال المغردين على مواقع التواصل في الهاشتاجات المتصدرة وغيرها.. مثلا
أثار نبأ إلقاء القبض على لاعب المنتخب المصري محمد أبو تريكة صباح اليوم في مطار القاهرة الدولي ردود أفعال غاضبة على الصعيد الإعلامي والجماهيري.
وقال الإعلامي وائل الإبراشي، إن تريكة لطالما أسعد المصريين، معتبرا أن توقيفه بهذه الطريقة "إهانة للوطن"، قبل اللاعب.
بدوره، اعتبر الإعلامي عمرو أديب أن القضاء المصري لم يوضح أسباب تصنيف اللاعب ضمن قائمة الإرهابيين، في الوقت الذي سبق وأن حكمت محكمة أخرى ذات اختصاص ببراءة اللاعب من دعم مشاريع الإرهاب.
أما نشطاء التواصل، فقد دشنوا هاشتاج "تريكة_مش_إرهابي"، عبروا فيه عن صدمتهم من إقدام قوات الأمن على توقيف تريكة.
وقال المغرد محمد الصافي إن "جزمة (حذاء) أبو تريكة أسعدت المصريين أكثر من وش (وجه) السيسي)، ووافقه صاحب معرف "ألتراساوي" بقوله إن "تريكة مبعش (لم يبع) تراب مصر عشان (لكي) يكون إرهابي"....إلخ

4. التحقيق:
باختصار، التحقيق هو التقرير العادي، لكن الفرق هو أن التحقيق لا يكون مرتبطا بحدث معين، وإنما يرجع لإرادة الصحفي في فتح الموضوع.. مثلا: موضوع عن انتشار التدخين في الجامعات.. فهذا موضوع صالح للمناقشة في أي وقت، بصرف النظر عن وجود حدث جديد تسبب في طرح الموضوع من جديد على الساحة.

والتحقيق مثل التقرير، يحاول رصد "كل شيء" عن الموضوع، بدءا من رصد ظاهرة التدخين في الجامعات إلى آخر الإحصائيات الصادرة عن الجهات الرسمية حول الموضوع والحلول المقترحة... إلخ.

5- الريبورتاج والبروفايل: 
وهنا يتحول الصحفي إلى مؤرخ يكتب التاريخ، الريبورتاج يكتب قصة حدث تاريخي معين، والبروفايل يكتب قصة شخصية واحدة معينة أو مكان محدد.. فمثلا، حين تحين ذكرى حداثة دنشواي، يمكن للصحفي عمل ريبورتاج عن الحادثة نفسها، يذكر فيها أسماء أبطال الحدث، أعمارهم، طريقة تعبيرهم، طرائق ومشاهدات حول الموضوع، الجو العام الذي جرى فيه الحدث.. وممكن يعمل بروفايل عن واحد فقط من شهداء الحادثة أو القاضي اللي حكم على الفلاحيين بالإعدام أو المكان اللي اتنفذ فيه الحكم.

6- المقابلة الصحفية (الحوار): 
وهو حديث يجريه الصحفي مع شخصية أدبية- سياسية أو أي شخص ما كان شاهداً على الحدث.

-------

ثالثا: الفرق بين الصحفي والكاتب، الخبر والمقال، المعلومة والرأي.. إلخ.


النقطة دي من أهم النقاط اللي لازم الصحفي يكون عارفها كويس، إيه الفرق بين الرأي والمعلومة؟ ببساطة، إحنا هنا بنتكلم عن التوثيق، الصحفي ما ينفعش يقول حاجة مش متأكد منها، ومش معاه عليها مصدر صريح. الصحفي ما ينفعش يقول تحليل للأحداث من غير ما ينسبه لمتخصص أو مواطن، هو مجرد راصد وناقل للأحداث والآراء.

المقال، بيكتبه شخص بيكون اسمه كاتب، مش صحفي.. لكن الخبر والتقرير والتحقيق والحوار، اللي بيكتبهم بيبقي اسمه صحفي.. المقال مش مطلوب من كاتبه إنه يحط مصادر أو ينسب كل تحليل لصاحبه (وإن كان ده مطلوب منه بشكل أدبي وأخلاقي)، لكن الصحفي لو ما ذكرش مصادره بيكون عمل جريمة.

من الآخر، أي جملة تقراها في خبر أو تقرير أو تحقيق وما تلاقيش مصدرها اللي تقدر ترجعله عشان تتأكد من الكلام ده، يبقي دي مش صحافة.. وأوعى تكتب أي حاجة من غير ما تكون حاطط مصدر كلامك، سواء تصريحات من وكالة دولية أو اتصال مع شخصية أو حتى من حساب شخص في مواقع التواصل.

وتقدر تعرف أكتر عن الميثاق الأخلاقي للعمل الصحفي من الموضوع ده: دور الإعلام في صناعة العنصرية العالمية


---

رابعا: الفرق بين الصحافة الورقية والإلكترونية، وصحافة المواطن، والصحافة التشاركية.. وعلاقة التقدم التكنولوجي بكل ده.


شوف، التطور التكنولوجي اللي عايشين فيه بيخلي كل يوم الأدوات الصحفية تتطور، الصحافة الورقية خلاص أيامها راحت، ودلوقتي دخلنا عصر أخبار الهواتف الذكية.. وطبعا ده أثر بشكل كبير على طبيعة العمل الصحفي ومبادئ الكتابة الصحفية والأولويات في العمل الإخباري.

زمان في الصحافة الروقية كان الخبر بيحصل العصر، تاني يوم ينزل في الجرنال، فالصحفي كان بيبقي عنده وقت كافي يعمل الخبر أو التقرير على مهله تماما.. كانت السرعة مش أولوية، المهم القوة في المعلومات.

دلوقتي أصبحت السرعة هيا أهم شيء، لأنه ببساطة لو ملحقتش تنشر الخبر بعد حصوله بعشر ثواني، هيكون موقع غيرك نشره وأخد هو الحصرية بتاعته وزياراته وتفاعلاته.. ودا الفرق الأبرز بين الصحافة الورقية والإلكترونية.

مع الوقت ظهرت أشكال أسرع من الصحافة الإلكترونية، زي صحافة المواطن والصحافة التشاركية.. ببساطة، لو ملحقتش تنشر الخبر بسرعة، مش بس هتلاقي موقع تاني نشره، لأ.. هتلاقي مواطن عادي نشره على حسابه في الفيس أو تويتر!

دلوقتي، كل مواطن بقى صحفي، كل موبايل بقى كاميرا صحفية، وكل إنسان ماشي في الشارع أصبح عنده المقدرة إنه يصنع الرأي العام ويصدر قضية معينة بمجرد ما يرصد خبر قوي فيها.. المواطن ما بقاش مستقبل للأخبار بس.. لأ، أصبح بيصنعها ويوجهها كمان.

إنت دورك كصحفي إنك تتابع مواقع التواصل كويس، ولو لقيت مواطن ناشر مادة قوية، خدها منه وانشرها إنت بسرعة عندك، لكن طبعا، لازم تنسبها له.. ببساطة، اتعامل مع كل حسابات التواصل الاجتماعي باعتبارهم مراسلين ومصادر أخبار ليك.

وخلي بالك، افتكر إني قلتلك فوق إنك لازم تكون صحفي شامل، بيعمل كل حاجة، ده بسبب التقدم التكنولوجي برضه، لأن خلاص المستقبل مش هيحتاج الصحفي اللي لغته قوية بس، أو المصمم اللي عنده أخطاء لغوية.. المستقبل في الصحافة للي بيخلص بسرعة، وبيعمل كل حاجة في أسرع وقت عشان الخبر يتنشر فورا.


الدرس الثالث: المهارات الأساسية للمحرر الصحفي:


ودي هنقسمها لـ 3 نقاط:
مهارات ثقافية - مهارات لغوية - مهارات بلاغية 

أولا: المهارات الثقافية:

الصحفي ما هو إلا شوية معلومات ومهارات، على قدر ثقافته السياسية والتاريخية والتخصصية، ومهارات البحث والتقصى عنده، هيكون قادر إنه يعمل أخبار قوية من أقل المعلومات المتاحة.

من أكتر الأماكن اللي بتقدر منها تعرف مدى ثقافة الصحفي، هيا الفقرة الأخيرة في الخبر العادي، الفقرة اللي بيحط فيها خلفية للخبر، بتقدر تعرف منها هو ثقافته عن الموضوع ده قد إيه.

مثلا: خبر عن إن شركة سامسونج سحبت كل أجهزة نوت 7 من الأسواق.
هتلاقي صحفي كاتب في الفقرة الأخيرة كالتالي:
يذكر أن المستخدمين كانوا قد اشتكوا من سوء خدمة الجهاز وانفجاره في بعض الأحيان.
وهتلاقي صحفي تاني كاتب:
يشار إلى أن الشركة كانت قد واجهت عاصفة من الانتقادات بعد أن تسبب هاتفها في تعطل رحلات طيران كان آخرها في مطار برلين الألماني بسبب انفجار الجهاز.

اسأل نفسك كده، مين الصحفي الأكثر ثقافة فيهم؟ أكيد التاني.. الراجل قارئ أكتر وعارف أحدث الأخبار.. حتى لو جابها من البحث، قدرته على البحث الجيد نفسها جزء من الثقافة بتاعته.

بالمناسبة، الصحفي اللي ثقافته ضعيفة ما بيقدرش يعمل تقارير أو تحقيقات، لأنه مش بيكون عنده أي معلومات عن الموضوع، بينما الصحفي المثقف بيكون قادر يبني تصور عن الخطة اللي هيشتغل بيها في التقرير بتاعه.

---

ثانيا: المهارات البلاغية:


إحنا هنا بنتكلم عن إن اللغة بتاعتك مش بس تكون صحيحة ومافيهاش أخطاء، لأ، كمان تكون فصيحة ومؤثرة.. إنك تختار أقوي كلمة ممكن تتكتب، وتكتبها، إن كل كلمة تكون في مكانها الصح.

المهارة دي بتكسبها من حاجتين، القراية الكتير في المصادر الصحفية الكبيرة والمواقع المعروفة، ثانيا: الكتابة الكتيرة لنفس الفكرة أكتر من مرة بصيغ مختلفة.. يعني هات موضوع واحد واكتبه خمس مرات بألفاظ مختلفة، واختار أحسن واحد فيهم.

مثلا، الرئيس الأمريكي دونالد ترامب هيسافر روسيا الشهر القادم.. شوف ممكن نعبر عن نفس المعنى ده بكام طريقة:
• ترامب في روسيا الشهر القادم
• الكريملين يستعد لاستقبال الرئيس الأمريكي
• ترامب يطير إلى موسكو الشهر القادم
• ترامب في ضيافة نظيره الروسي مطلع الشهر المقبل
• بوتين يلتقي نظيره الأمريكي في موسكو الشهر القادم
• تأسيسًا لحقبة جديدة.. طاولة «الصداقة» تجمع بوتين وترامب في موسكو

مثال تاني، خد بالك إن العبارات اللي جاية دي كلها بتعبر عن معني واحد:
- أكد وزير الرياضة المصري محمد صبحي مشاركة منتخب الفراعنة في بطولة كأس العالم القادمة في قطر.
- قال محمد صبحي، وزير الرياضة المصري، إن بلاده ستشارك في كأس العالم المقبل المزمع انطلاقه في قطر مطلع هذا العام.
- من جانبه، بدا محمد صبحي وزير الرياضة، واثقا وهو يقول للصحفيين إن بلاده ستكون ضيفة على قطر في كأس العالم المرتقب.
- وأشار وزير الرياضة المصري محمد صبحي إن منتخب بلاده يجهز حقيبته للطيران إلى كأس العالم في قطر.
- ويقول وزير الرياضة المصري محمد صبحي إن الجماهير ستكون على موعد مع كأس العالم المقبل حيث سينجح المنتخب المصري في حسم الصعود، حسب تأكيدات الوزير الواثقة... إلخ

ومن المهارات اللي لازم تبقي عندك برضه، مهارة القدرة على التحكم في تطويل الكلام أو تقصيره حسب المعلومات المتاحة، يعني إزاي تعبر عن فكرة واحدة بخمس كلمات، وتعبر عن نفس الفكرة برضه بخمسين كلمة:

- يعني في المثال السابق ممكن نعبرعنه بفقرة قصيرة جدا زي:
قال وزير الرياضة المصري محمد صبحي إن بلاده ستشارك في كأس العالم المقبل.
- وممكن نعبر عن نفس المعلومة بفقرة طويلة زي: 
وقال وزير الرياضة المصري محمد صبحي إنه واثق من قدرة منتخب بلاده -الذي يعاني تعثرا كبيرا- على تجاوز التصفيات ليحل ضيفا على الاحتفالية الكروية الأكبر في العالم، التي ستشهدها الأراضي القطرية مطلع العام المقبل بمشاركة 34 منتخبا دوليا مؤهلا.
- وممكن نعبر عن نفس الفكرة بفقرتين أو تلاته (خبر كامل)، بنفس المعلومات، زي ده:
أشاد وزير الرياضة المصري محمد صبحي بإصرار منتخب بلاده على تخطي عقبة التصفيات المؤهلة لبطولة كأس العالم المقبلة والتي ستستضيفها الملاعب القطرية مطلع هذا العام.
وقال صبحي، في تصريح صحفي، إنه واثق من نجاح المنتخب المصري في المشاركة ضمن البطولة، برغم التعثر الأخير الذي بدا واضحا في المباريات الأخيرة للتصفيات.
يشار إلى أن المنتخب المصري يعاني موقفا صعبا إثر خسارته عددا من المباريات في بداية التصفيات، مما وضعه في الترتيب الثاني للمجموعة، لتتبقى له مباراة واحدة تحسم إيجابًا -في حال الفوز- مصير مشاركة المنتخب في البطولة.

المهارة دي تحديدا مهمة جدا عشان لما يكون مافيش معلومات كافية، مثلا إنت لقيت إن عدد كبير من المواطنين كاتبين على تويتر إن قوات الأمن ضربت رصاص على المتظاهرين في منطقة كرداسة، وفيه كذا واحد كاتب إنه شاف مصابين... ومعندكش أي تفاصيل أكتر من كده.

مطلوب منك ساعتها تبني الخبر كالتالي مثلا:
الأمن يطلق النار على متظاهري كرداسة.. وأنباء عن وقوع مصابين
أكد شهود عيان أن قوات الأمن فتحت نيرانها، قبل قليل، على المتظاهرين بمنطقة كرداسة الواقعة بمحافظة الجيزة.
وتحدث شهود العيان، في سلسلة تغريدات عبر مواقع التواصل الاجتماعي، عن وقوع إصابات في صفوف المتظاهرين.
وكانت تظاهرات قد خرجت في عدد من المحافظات استجابة لدعوة أطلقها ما يسمى بتحالف دعم الشرعية المؤيد للرئيس المعزول محمد مرسي.

آخر مهارة بلاغية لازم تكون عندك هي القدرة على تمييز اللقطة المهمة في الخبر.. إيه اللي هتحطه في العنوان.. يعني مثلا، في الخبر اللي فات واضح إن أهم نقطة مثيرة هيا وقوع إصابات في صفوف المتظاهرين، صح؟ .. بس فيه مشكلة، إن مافيش تأكيد على الموضوع ده، مش كل الحسابات كتبت إنه فيه مصابين.

بالتالي إنت هتأخرها في العنوان، وتكتبها بصيغة متشككة (وأنباء عن وقوع مصابين)، لكن هتخلي اللقطة الأساسية المؤكدة، إن قوات الأمن فتحت النار على المتظاهرين.

ببساطة اتعلم اختيار اللقطة الأبرز في أي حاجة بتقرأها، وخلى بالك، مش بنقول القرآءة وخلاص، لأ، بنقول القرآءة السريعة، يعني تقرأ كتير، وفي نفس الوقت تفهم اللي بتقراه، وتقدر تحدد أهم جزء فيه.. كل ده بسرعة، قبل حد غيرك ما ينشر الخبر.

------

ثالثا: المهارات اللغوية:


شوف، باختصار شديد، ما ينفعش يكون عندك أخطاء لغوية في الكتابة، حتى لو كان فيه مصحح لغوي بيراجع بعدك، ما ينفعش الخبر يوصله فيه خطأ إملائي فاضح على أقل تقدير.

هنقسم مهارات اللغة الصحفية لعدد من العناصر كالتالي:

أولا: فعل (قال) ومشتقاته:
• لازم تعرف إن الأخبار عادة بنستخدم فيها الفعل الماضي، وأشهر الأفعال المستخدمة في بداية الفقرات هي (قال، ذكر، أوضح، أضاف، تابع، نوّه، أعرب، أفاد، أشار، صرح، زعم) وهكذا.

• لاحظ برضه إن كل فعل لازم تستخدمه في مكانه الصحيح، يعني ما ينفعش يبدأ الخبر بفعل "أضاف"، لأنه لسة ما قالش حاجة عشان يضيف عليها.

• الفعل أكد بيستخدم لما حد يؤكد معلومة، لكن الفعل زعم بيستخدم لما حد يقول حاجة غريبة أو إحنا مش متأكدين منها أو عايزين نقول إنه كداب.

• أشهر غلطة في موضوع الأفعال هو التمييز بين (إن) و(أن) اللي بتيجي بعد الفعل، القاعدة بتاعته بسيطة، الفعل قال فقط هو اللي بيجي بعده إن، لكن بقية الأفعال بيجي بعدها أن.. باختصار، قول: قال إن.. وأضاف أن، وأكد أن، ونوه إلى أن، وأشار إلى أن، وزعم أن، وصرح بأن...إلخ.

ثانيا: الأفعال الأخرى:
تقدر تستخدم أي فعل في بداية الفقرات، مش لازم كل حاجة تكون قال وأكد وذكر وهكذا.. يعني مثلا ممكن تقول:
قُتل عشرة أشخاص - لفظ 5 مواطنين أنفاسهم الأخيرة - لقي عشرون شخصا مصرعهم.. إلخ

نقطة كمان مهمة قوي.. (ما تستخدمش فعلين في عبارة واحدة).. يعني ما تقولش: (قال رئيس الوزراء كذا، وأكد على كذا).. الفقرة الواحدة بيكون فيها فعل واحد.. ولو لقيت نفسك مزنوق ومش عارف تطلع من المشكلة دي، فيه حل مشهور بيستخدمه الصحفيين، وهو تحويل الفعل التاني لمصدر.. يعني تكون العبارة كده: (قال رئيس الوزراء كذا، مؤكدا على كذا).. أو (قال رئيس الوزراء كذا، مشيرا إلى أن كذا).. وهكذا بقى، عشان تكون حققت الشرط وفي نفس الوقت خرجت من المأزق.

ثالثا: أخطاء شائعة:
وهي الأخطاء الإملائية والكتابية، فلا يكون مقبولا من الصحفي أن يكتب (مدرسه) بدلا من (مدرسة)، أو (صحه) بدلا من (صحة)، أو (علي) بدلا من (على)، أو (يقضى) بدلا من (يقضي)  أو (إسم) بدلا من (اسم) مثلا.

رابعا: جمل ركيكة: 
وهي جملة ضعيفة بلاغيا عليك أن تبتعد عنها، مثلا لا تستخدم الفعل (قام)، فبدلا من أن تقول (قام بافتتاح)، اكتب: (افتتح).. وكذلك لا تستخدم (كان الوزير قد قال)، واكتب: (وقال الوزير في وقت سابق).. وهكذا.. باختصار: ادخل في الموضوع على طول.

خامسا: علامات الترقيم:
وهي من أشهر الأخطاء الكتابية، على الأقل تكون عارف استخدام الفاصلة (،) والنقطة (.).. وتكون عارف إن علامات الترقيم بتكون لازقة في الكلمة اللي قبلها على طول من غير مسافة.. يعني ما تكتبش (وقال الوزير  ،  في تصريحات).. واكتب: (وقال الوزير، في تصريحات).

• الدرس الرابع: إزاي تبدأ مشوارك في الصحافة؟


مافيش طريق محدد نقدر نحدده عشان تمشي في مجال الصحافة، كل واحد بيتحرك حسب الفرص والتحديات اللي في حياته، لكن عموما التحرير من أكتر المهارات اللي سهل تتعلمها ذاتيا، لأنك تقدر تتابع نفسك فيها بدون احتياج لرقابة أو توجيه من حد.. وهنقسم طريق التعلم الذاتي للتحرير لـ 4 خطوات:

الخطوة الأولى: 
حط لنفسك نموذج صحفي مثالي، وحاول تقرب منه.. وليكن مثلا موقع الجزيرة، أو بي بي سي عربي.. أو أي موقع تكون بتثق في لغته التحريرية.

امسك الموقع ده واقر فيه كتير، اقرأ بهدوء، اعرف أشهر الجمل اللي بيستخدموها وأكتر الكلمات اللي بيركزوا عليها.. تفضل تعمل كده لحد ما تحس إنك بقيت مستوعب للغة الصحفية بتاعت الموقع ده.. إنك تقدر تتوقع هيقولوا إيه قبل ما يقولوه.. وساعتها لما حد يسألك إنت مدرستك الصحفية إيه؟ تقوله: الجزيرة، أو بي بي سي... إلخ

الخطوة التانية:
الخطوة اللي بعد كده هيا إنك تجيب خبر معين منشور في الموقع ده، وتحاول تشوف المواقع التانية عاملاه إزاي.. المقارنات بقى.. إنك تقارن بين الصياغة اللي اتعلمتها في الموقع وبين صياغات المواقع التانية..

الهدف من الخطوة دي إنك توصل لأحسن صياغة تقدر تستوعبها، عشان بتدأ تعمل لنفسك الشخصية المستقلة في الكتابة الصحيفة بقى.. تصنع أسلوبك الكتابي اللي هيميزك بعد كده..

الخطوة التالتة:
الخطوة دي مهمة جدا.. إنك تدخل على الأخبار في كل المواقع، لكن ما تقرأش متن الخبر، إنما تدخل تدور على المصدر اللي الموقع جايب منه المعلومة اللي في الخبر.. تحاول توصل للمصدر الأصلي للخبر..

يعني مثلا، لو هما جايبين تصريحات على لسان سياسي كاتب تغريدات على تويتر.. تدخل حساب تويتر بتاع المصدر، وتجيب التغريدات.. وتبدأ إنت تعمل منها خبر لوحدك..

وبعد ما تخلصه، تقارنه بالخبر الأصلي اللي منشور في الصحيفة.. لحد ما تحس إن مستواك بقى قريب من الموقع، أو بقى أحسن منه..

الخطوة الرابعة والأخيرة:
الخطوة الأخيرة بقى، إنك تدخل على الفيس وتويتر، وتجيب إنت أخبار وتصنعها من بوستات وتغريدات الناس.. دي مرحلة تعتبر التهائية في التدريب، واللي معاها بتكون جاهز تبعت شغل للصحف بأريحية وثقة..


وأخيرا خلينا نتكلم عن شوية نصايح لو مشيت في ظلها هتفرق معاك كتير:

• مبدئيا لازم تشوف حد فاهم في الصحافة وتطلب إنه يساعدك في التدريب، زي إنك تبعتله الأخبار اللي تعملها، أو حتى تطلب منه إنه يبعتلك نماذج للأخبار ويراجعها معاك بعد ما تخلصها.

• اعمل لنفسك مدونة، واكتب فيها كتير بغض النظر عن كون فيه حد بيدخلها ولا لأ، اكتب فيها عشان بعد سنة تدخل تشوف مستواك في اللغة اتحسن ولا لأ، وكنت فين وبقيت فين.

• بلاش تعمل شير وريتويت كتير ع الفيس وتويتر، اكتب إنت، اكتب منشورات وتغريدات، شوف تفاعل الناس معاك، اكسب جراءة الكتابة والتجربة.

• استغل المنصات والمواقع المجانية للنشر، ابعت لكل المنصات اللي بتسمح للكتاب بالمشاركة، مش عايز أقول أسماء معينة، لكن المنصات معروفة، وكل يوم بيطلع منها جديد.

• ادخل دايما المواقع الكبيرة واقرأ فيها كتير، اقرأ التقارير بالذات، واختار المواقع القوية، بي بي سي وسي إن إن والجزيرة والعربية نت وغيرهم.

• اسمع نشرات أخبار باللغة العربية كتير، بالذات الجزيرة لأن مذيعيها أقوى نموذج عربي إعلامي في النطق الفصيح السليم، هتلاقي النشرات كاملة على اليوتيوب.

• اكتب صح، اتعلم تكتب صح، اكتب مقالات أو أخبار وابعتها لأي حد تعرفه متخصص في اللغة العربية وخليه يراجع شغلك ويقولك على أبرز الأخطاء المتكررة عندك.

• اعمل أرشيف لشغلك، كل خبر تعمله انشره في مدونتك، اعمل لنفسك رابط تقدر تبعته لأي حد يسألك عن شغلك.

• ظبط سيرتك الذاتية، اعمل سيرة ذاتية قوية، اكتب فيها كل حاجة عن نفسك، وحاول تبرز فيها مهاراتك، وديما ركز على إنك توصل لمرحلة الصحفي الشامل.

• اشتغل أون لاين، ابحث دايما عن المواقع اللي محتاج صحفي عن بعد، واشتغل معاهم حتى لو متطوع، سواء مراسل أو صحفي أو أي شيء، هتكسب خبرة كبيرة.

• اطلب من الصحفيين اللي تعرفهم يدلوك ع الطريق، ابعتلهم السيرة الذاتية بتاعتك واطلب منهم لو جات قدامهم فرصة يبعتولك.

• اتعلم كل يوم مهارات جديدة، التطور التكنولوجي هيخليك متميز في أي مكان تدخله، الصحفي دلوقتي بمهاراته، مش بمصادره.



دور الإعلام في صناعة العنصرية


كيف يتشكل وعي الناس؟ وكيف يبني العوام تصوراتهم عن الأمور التي يجهلونها؟ هل نقتصر في فهمنا للواقع على ما نعاينه بأنفسنا؟ ولماذا يتخيل الكثير شكل «الشيطان» صاحب الذيل الأحمر الطويل والشوكة الثلاثية؟ من صنع هذا بعقولهم؟ وكيف يصدق الناس -حتى من يعرف أنها كذبة- هذه الكذبة؟


مقالات حرة

شعر وأدب

بحوث

 

كتابات حرة

حياة المدون

مشروع توثيق

ملف البنات

جميع الحقوق محفوظة © 2017 مدونة عمار مطاوع

تصميم: Templateism